Google Website Translator Gadget

2011-03-14

عن عصافير امن الدولة نتحدث

فكرت ان انا اكتب عن الموضوع ده من زمان بس صراحة شفت ان ما يصحش وما ينفعش ان اكتب عن حد وهو في حالة ضعف عشان مبقاش كأني بستغل ضعفه ده.
لكن اما اتفاجأ إن ناس من اتباع الحزب الوطني ومن يطلق عليهم بداخل الكليات (عصافير امن الدولة)  بيحاول يعيدوا تنظيم انفسهم ويطلقوا علي نفسهم ابطال الثورة
لأ وايه يقولوا علي ابطال من اللي نزلوا انهم كدابين وما نزلوش مظاهرات وان بعضهم بيزيط في الزيطة
اما اشوف كل دا بيحصل قدام عيني واسكت
اعتقد ساعتها ان مقولة الساكت عن الحق شيطان اخرص هتنطبق عليا وساعتها برضه رفضي لظلم النظام السابق واستبداده هيكون جه علي فشوش وهبقي بضيع ارواح الشهداء اللي استشهدوا وبضيع تعبي وتعب اصحابي وزمايلي من الناس اللي حاربت في سبيل الحرية
وانا صراحة حزين اني اضطريت اكتب عن الموضوع ده كان نفسي بجد احتفظ لنفسي بحاجات كتير اعرفها عن اتحاد الطلبة ومعرفهاش لحد لكن للاسف مضطر
معلش انا طولت شوية بس ندخل بقي في الموضوع هحكي عن بعض ما رأيته بعيني السنة اللي دخلت فيها اتحاد الطلبة واللي كانت اسوأ سنة في حياتي
نبدأ مثلا بمسلسل الانتخابات
اللي بيحصل كالآتي :-
 فجأة وبدون اي اعلانات يبدأ اعضاء اتحاد الطلبة بتاع السنة اللي فاتت ف تجميع اسماء لطلبة للدخول في الانتخابات بدون اي اعلانات
او احيانا عشان ماحدش يكسفهم يعلقوا الورقة يوم كدا ويشيلوها بعدها قال ايه عملوا اللي عليهم .
لحد كدا كويس طيب وبعدين بيكون مطلوب من كل دفعة عدد 12 عضو في الاتحاد  --( هم تقريبا دلوقت بقوا 14 مش متأكد من دي) -- المهم انهم بيجمعوا اكبر عدد ممكن من الطلبة عشان يعملوا الانتخابات الوهمية
حد تاه مني ؟
نكمل بعد تجميع الاسماء تحصل عملية الفلترة بقي اللي بتكون في مكتب قائد الحرس سابقا طب ايه يعني  فلترة دي بص يعني من الاخر ياخدوا ال 12 المطلوبين علي مزاجهم من ضمن حشود كبيرة جدا متقدمة برضه ع مزاجهم .
طب بيعملوا كدا ازاي يعني بيختاروا اللي ع مزاجهم دول ازاي ؟
حد سمع قبل كدا عن النجاح ف انتخابات بالتزكية او بالتنازل ؟
اكيد اه طبعا.
طب هيقنعوك ازاي تتنازل انا استحالة اعمل كدا ؟
هههههه ياباشا مش بيقنعوك دول بيمضوا باسمك تنازلت انا فلان الفلان تنازلت عن منصبي في اتحاد الطلبة لفلان الفلان او اعلن انا فلان انسحابي من انتخابات الاتحاد وعليه يفوز فلان الفلان وكل دا من غير ما تعرف وياعيني تكون فاكر نفسك عضو اتحاد طلبة وانت اصلا ماضي تنازل لنفسك وانت مش عارف
طب اللي بيفوز دا بيختاروه ازاي طيب
هههههه من هنا بقي جات كلمة عصافير امن الدولة .
هو حد مش عارف ان امن الدولة كان حاشرة مناخيرها في كل حاجة حتي تعيين الدكاترة ف الكلية.
من الاخر تحريات عنك وعن قرايبك لو ليك اي نشاط او حاجة.
طيب ندخل ع امناء اللجان بصوا بصراحة مش كل واحد مسك امين لجنة هيكون عمل اللي هقوله ده اللي هحكيه دا من 3 اشخاص تقريبا كانوا بيعملوه كتير اللي هو ايه بقي ؟
هقعد معاك يامعلم وعارف ان دكتور فلان انت بتكرهه جدا وهقولك دا ابن وابن وتيجي انت سعادتك شاتم اجي انا مسجلك وباعت التسجيل لدكتور فلان ف انزلك من لايحة الاتحاد .
اكتر حد عمل الحركة دي في الناس كان حد اساسا مش بيمسك امين اي لجنة بس هو بيتبرع بكدا زي ما كان هو او هي مش هتفرق اكتر حد بيمضي تنازلات للناس برضه .
وعلي فكرة سجلي مكالمة كنت متضايق فيها من امين لجنة وبشتم وبعتهوله بس عادي مكنتش بتفرق معايا اساسا.
دا بالنسبة للمناصب كانت بتتاخد ازاي.
 طب ايه حوار عصافير وحمام والكلام ده
بصوا بقي من وظايف طلبة الاتحاد ساعة اي مظاهرة هي التصوير اقسم بالله ان مرة مسئول كبير في الاتحاد هو وصاحبه طلبوا مني انا وواحد صاحبي نصور مظاهرة حتي ماكنتش اخوان كانت طلبة عشان حاجات في فلسطين قال ايه عشان بنعمل ارشيف انا صراحة ساعتها مكنتش فاهم لا انا ولا صاحبي جينا مصورين وفاكرين اننا كدا بنعمل اكتيفيتي وبعتناله الصور نتفاجأ بيه بيأخد الصور وطالع لمكتب الحرس طبعا شدينا معاهم واخدنا منهم موبايلاتنا وجالنا صدمة واتضايقنا جدا جدا .
كان طبعا رد الفعل الطبيعي للي بيحصل ده اننا سبنا الاتحاد وما دخلناهوش بعد كدا.
هحكي بقي عن موقف حصلي السنة اللي بعدها بعد ما كنت قولت مش هدخل اتحاد وكدا المو قف ايه بقي ؟
كان في واحد صاحبنا عنده مشكلة او خناقة بمعني اصح ف طلع عند مكتب  قائد الحرس ف بكلمه اسأله انت فين قالي طلعتله لقيته جوا عند سعادة الباشا الظابط وقفت استناه لقيت واحد من سعاة الباشا قائد الحرس بيسلم عليا بحرارة وبيقولي عايزك ف كلمة ع جنب ايه ياريس خير ؟
الكلام كالآتي
هو : في عالم وسخة (سوري ف اللفظ بس دا اللي قاله ) بتوزع ورق كدا اسمه الجمعية مش عارف ايه كدا للتغيير بتاعت البرادعي عميل امريكا الناس دي عايز تخرب البلد لو جبت اسم حد منهم هاتهولي او اديه للباشا .
انا : اه عارفهم ما انا مضيت عليه وكنت عايز اوزع معاهم كمان .
هو : نعم هو انت مش اتحاد طلبة .
انا : لأ انا سبته من اخر السنة اللي فاتت .
هو : طب معلش حصل خير
انا :عادي ولايهمك
هو: طب ممكن لو شفت **** تبعتهولي او للباشا او احسن تجيب رقمه
انا :لو شفته هبعته ان شاء الله بس رقمه مش معايا
هو :شكرا
انا : العفو اي خدمة
هسيبلكم التعليق بقي
 لاحظوا ان الحواد الطويل دا كله ع كلمة عصافير امن دولة مش علي هجص وناس بتقول سرقة ميزانية وشنط وشهادات مؤتمرات ووجبات والهبل دا.
مع ان  دا ما ينكرش ان في حاجات من الاخيرة دي فعلا بتحصل بس اعتقد انها اتفه من اننا نتكلم فيها.

حابب اوجه رسالة لزمايلي بتوع الاتحاد السابق انا اسف اني كتبت الكلام ده بس للأسف ان في شخصيات منكم اضطرتني اني اعمل كدا ودا ما يمنعش ان في منكم ناس محترمة وهم عارفين نفسهم يتعدوا ع صوابع الايد وعارفين رأيي فيهم كويس.
متأسف للجميع ع التطويل ده بس انا والله برضه تعبت ع ما كتبت الحوار ده وخصوصا اني بفتكر حاجات من كذا سنة فاتت وعلي فكرة انا عندي حاجات كتير جدا جدا جدا بس انا مكتبتش غير اللي انا شفته بعيني وحسيته واتصدمت منه  مش نقلا عن كلام اي حد.
ومرة تانية متأسف ع التطويل


ليست هناك تعليقات:

إرسال تعليق

leave ur comment

الاكثر قراءة

ShareThis