Google Website Translator Gadget

2011-04-23

رسالة الى السيد عمرو موسى امين عام جامعة الدول العربية

رسالة الي السيد عمرو موسي
وزير الخارجية الاسبق
وامين عام جامعة الدول العربية
في عهد من عهد السيد الرئيش المخلوع محمد حسني مبارك
نبدأ الرسالة
قالوا عنك ياسيد عمرو أنك بهلوان سياسي
ودا ع لسان مدير دعايتك الانتخابية
ولكنك ولسوء حظك اثبت فشلك في هذا
عندما دعيت لساقية الصاوي
وانسحبت منها بسبب عدم استطاعتك ان تواجه الشباب
اللي عمال تتغني بحبك ليهم ف كل مكان.
وزيه ف الجامعة الامريكية .
اما عن طنطا فلم يثبت فقط فشل هذا ولكن اضيف اليه ما هو اسوأ .


قلت استقبلناك بالزفة البلدي
ومحصلش.


قلت جاوبت ع كل اسئلتنا
ومحصلش.

قلت اتجمعنا حوالين عربيتك نودعك وانت ماشي
والسبب هو احتجاج الناس ع الندوة واللي حصل فيها .

قلت انك سمعت السيدة اللي جات تشتكيلك عشان نفسها ف شقة
وحرسك اتعاملوا معاها بمنتهي العنف
بطريقة لا تليق ان يعامل بها ذكر فما بالك بأنثي .

عندما عاتبك الطالب محمود ميسرة ع شعر المدح ف شخصك
اجبته دا شعر فيه الكثير من الركاكة ،،،
حتي مش قادر تجاوب برد تجامل فيه اللي تعب وكتب الشعر ده.

طلع واحد قال انا بمثل ائتلاف شباب الثورة بالقاهرة
واحنا بنأيد عمرو موسي
واكلم واحد منهم يقولي احنا ما قولناش موقفنا من اي مرشح،،،
اذا كان دا خطأ من بتوع حملتك فأنت تتحمله .

قالوا عنك انك طالما عارضت النظام السابق واعتقد ان دا محصلش

فاكر اما قلت هتنتخب مبارك ؟
كملت بعدها ايه => تعجبني طريقة ادارته للامور ،، فين المعارضة بقي ؟

كانوا فاكريين انك اتنقلت جامعة الدول العربية عشان عارضت مبارك
بينما انا شايف انه مجرد تبديل للاماكن
لانك لو كنت عارضته فعلا كان حصل معاك زي مثلا : الجنزوري ، احمد رشدي ، منصور العيسوي ، عصام شرف ولاحظ ان انا بذكر اسماء مسئولين سابقين وليس مجرد معارضين او صحفين

قلت انك ما روحتش التحرير وبعد كدا قلت انك روحت تحميهم،
طب تحميهم ازاي مسكت عصاية تدافع بيها ولا عملت ايه


وبعدين لو كنت معارض فعلا كنت نزلت مظاهرات معانا
، كنت اعتصمت اعتصامات معانا
مش تقول روحت احميهم
وبعدين ايه سبب التناقض ده روحت ماروحتش .

اتسألت في ندوة طنطا
رأيك عن محاكمة مبارك قلت انها صح عشان تظهر الحق والفساد والذي منه
وبعد كدا اتسألت رأيك ف مبارك
قلت اؤيده واحبه ولكن اكره سياساته طب ازاااااي فهمني .

انا مش فاهم سر تطلعك لهذا المنصب
الجو بتاع عهد مبارك وفلوله انتهي
اعرف إنك لو في يوم مسكت الحكم انه بقي تكليف مش تشريف
وشوف عصام شرف طالع عينه ازاي
عمال من السودان لسينا للقاهرة
وكل دا في فترة انتقالية مش رئيس وزراء ثابت
فما بالك بما ستواجهه عندما تتولي الرئاسة
وخصوصا اننا ان شاء الله هنبقي ف بلد برلمانية مش رئاسية
يعني خلاص يا سيدي امين عام جامعة الدول العربية
دا مش زي زمان
دلوقت
الراحة بقت للشعب
ووجع الدماغ للمسئولين
احذر احذر احذر
والسلام عليكم ورحمة الله وبركاته

2011-04-21

شعر لعمرو موسى

شعر لعمرو موسى بقلم الطالب محمد وحيد
طالب فى 3 طب طنطا

اتيت ..فتكلمت...فخسرت ياعمرو


هحييك باخلاق المصريين
شرفتنا .......... ونورتنا
اصل انت واحد مننا
اصل انت مصرى زينا
لكن لما فكرك يعارض فكرنا
لما حكمك لمصر يوقف حلمنا
اسمحلنا نقولك..... من حقنا
سيبنا نرسم حلمنا بفكرنا


مسرحيه واتلعبت بس من فصل واحد
بس فيها اعجب اربع مشاهد
بحق ربنا .... استفذوا الواحد

المشهد الاول..
موكب كبير 24 سياره
ليه كده؟ انت رايح تعمل غاره
ده انت جاى حتى توصل رساله


المشهد الثانى..
فى زمن الظلم والبهتان
يحكى ان كان يامكان
قلت هرشح مبارك للرئاسه عبرالزمان
طيب مشفتش فى عصره الموظف الغلبان
مخدتش بالك م اللى نام من الهم جعان
ولا كل اللى همك ان الكرسى بامان

المشهد الثالث..
سألوك عن مصر!
سألوك عن غزه وايران!
سألوك عن اسرائيل!
رديت علينا بمواويل
كلام معسول....اقاويل

المشهد الرابع..
واللى غايظنى وحارق دمى الاداره
عاوزه ناس بتسمع بس ساكته
وبعد الكلام صقفه وابتسامه
بقى هى دى الحريه ياجاره

هذا الزمن انتهى ولن يعود !!!
سنتخطى العقبات وسنكسر القيود
لن نعد نصدق اكاذيب الوعود

لتحكم مصر..
لابد من فكر يتخطى الحدود
عمل شاق يحتمل الصمود
فافعل.....او ارحل ولا تعود

---------------------------------

2011-04-20

اللى حصل انهاردة فى مؤتمر عمرو موسى

بدأ الموضوع فجأة بايفينت على الفيس بوك
فيه دعوة من رئاسة الجامعة لحضور مؤتمر السيد عمرو موسى
وكان الكلام واضح ان المؤتمر دا بدون دعوات او تسجيل اسماء او اى حاجة
وفجأة برضه و يوم التلات نبص نلاقى ودا بالصفة موظفيين من شئون الطلبة بيسجلوا اسماء طلبة عشان يحضروا المؤتمر
ويغيب التسجيل نص ساعة ولا حاجة
ونكتشف ان الاسماء اللى اتسجلت لطلبة اتحاد الطلبة القديم
عصافير امن الدولة
وان اللى بالصدفة عرفوا يحطوا اسمائهم اتشطبت الاسماء دى

المهم تالت يوم بقى انهاردة روحنا نحضر المؤتمر يفتشونا على البوبات
ونلاقيهم عايزينا نطلع لقاعة فى الدور التالت فى مركز المؤتمرات ونتفرج على عمرو موسى فى شاشات عرض
الله ما كنا قعدنا فى بيتنا ما كل يوم بنشوفه فى التلفزيون
حاولنا نتكلم مع امن الجامعة اننا ندخل القاعة اللى فى الدور الارضى اللى هيحضر فيها عمرو موسى
رفضوا وقالوا دى بتاعت اعضاء هيئة التدريس وشخصيات عامة وصحافة
قلنا خلاص مالناش حق
نلاقيهم بيدخلوا طلبة عاديين
نسالهم ايه دول يقولوا دول طلبة كليه حقوق هى اللى منظمة المؤتمر وحقهم يحضروا
نشوف بالصدفة جوا واحد زميلنا فى كلية طب
امين اتحاد الطلبة السابق
هو دا حقوق يا ناس ولا ايه
المهم قلنالهم دا فى طب معانا مش حقوق دخلوا واحد مننا طلع الطالب ده برا
ووانا واقف بتابع اتفاجأ بواحد بيطلع لبتاع الحرس ورقة بص فيها بتاع الحرس وجه مدخل الطالب ده
استغربت روحت اسال الحارس قالى يلا من هنا مش شغلك الكلام ده
وكأنه هيضربنى المهم قلتله وطى صوتك شوية وانت بتتكلم وارتفع صوتنا وجه عقيد قوات مسلحة
خلص الموضوع
المهم دخلنا ازاى بقى بالعافية اما لاقونا بنقول مظاهرات و كدا قالك يعم بلا وجع دماغ دخلهم






دخلنا الندوة
اعداد رهيبة كانت على الباب كانوا عايزين يمنعوهم يدخلوا



بس ربنا كرمنا وبدأنا ندخل
وكان معد الندوة الساعة 11 ونص وصل عمرو موسى الساعة 12
تعليق : هو مرشح الرئاسة مش عارف يلتزم بميعاده
المهم فى النص ساعة دى بقى اسعار واغناى واحاجات عجيبة كدا بتحصل وكانت نص ساعة صعبة خلصت بقدرة ربنا
جينا بقى على وصول عمرو موسى



والنفاق اللى فى الدنيا كلها حصل
استقبال باشعار وسيرة ذاتية وامجاد اصله صاحب الضربة الجوية الاولى هو كمان
خلصت فترة النفاق
بدأت فترة عمرو موسى

مش فاهم اللى حصل حاجات غريبة كدا وكلام غريب مالهوش اى علاقة بأى حاجة بتحصل

خلصت فترة الهرتلة

ووسط الفترة دى احنا كنا بنجمع الاسئلة

اللى تعبنا جدا فى تجميعها ووكتابتها

وجالنا واحد من بتوع الدعاية لابس تيشيرت مرسوم عليه عمرو موسى

اخد الورق وقال مش هينفع كله يسال احنا هنطلع الورق ونقرأ الاشئلة
واشطة بقى على الفلترة
الاشئلة المهمة اترمت ولا معرفش ايه حصلها
وابقت اسئلة ايه رأيك فى ايران
ايه رأيك فى الثورة
وعلى هذا المثال نسير

والمهم ان انا سألت واحد من الحملة فين اسئلتنا قالى مش اى اسئلة عشان اللى حصل فى ساقية الصاوى والجامعة الامريكية ما يتكررش

طبعا الناس اتنرفزت جدا جد جدا
وواضطروا اسفين لانهم يطلعوا ممثلين للكليات
هههههههههههههههه
كمية كروتة بتحصل مايعتبرش بيجاوب على اسئلة يا ناس
واحد بيقوله انت قلت مبارك اب لكل المصريين مع ان مفيش اب يعمل كدا
قال اه هو اب وهى دى اجابة
واحد بيقوله ايه رأيك فى مبارك قال انا احبه و اؤيده ولكن ارفض سياساته
مش هو دا اللى قال قبل كدا تعجبنى طريقة ادارة مبارك للامور ولا انا غلطان
نقوله ليه ما طلبتش حظر جوى على غزة سنة 2008 يقول دى ما كنتش حرب دا كان حصار
هههههههههههههههههههه
اضحك ولا ابكى
ايه رأيك فى ايران دى جزء مننا ونتعامل على انها موجودة فى الشرق الاوسط معانا يس لازم الحوار
طب ايه رأيك فى اسرائيل
يجب الاعتراف بوجودهم ويجب عليهم الانسحاب من كل الاراضى العربية
طب حضرتك عملت ايه لكدا يا سيد عمرو موسى
لحد اخر واحد طلع اتكلم قال انا بمثل كل كليات الكلية ما عدا حقوق عشان اللى حصل معانا قبل ما ندخل
قال الكلام ده ونلاقى الحرس الخاص فصل المايك من على الطالب دا ونلاقى عمرو موسى بيشكرنا على الندوة ويجى منسحب وماشى
زاللى حصل دا كوم والباقى كوم تانى
الناس العمال بتوع الكليات عايزين يشتكولوه من همومهم حاولوا يكلموه مرضاش
والبدى جاردس بقى قمة قلة الذوق فى التعامل مع الناس
وبسأل واحد يقال انه مدير اعماله امال اسئلتنا ما اتجاوبش عليها ليه
يقولى دا مش مؤتمر دا حاجة لتمجيده و الكلام متصور فيديو
والسواقين بتوعوه يمشوا بطريقة قمة قلة الادب فى السواقة وبرضه كله فى الفيديو دا مش هتكلم فيه هسيب الفيديو يتكلم


http://www.youtube.com/watch?v=i7W6fQRUv9c

بالمناسبة دا الموكب بتاعه
http://www.youtube.com/watch?v=daujYP_UiuI&feature=share


اضافة : فيديو احراج الطالب محمود ميسرة لعمرو موسى
http://www.youtube.com/watch?v=1H659-CIdQo

اضافة 2 : موقف اتحاد الطلبة المنتخب من ندوة عمرو موسى
http://www.youtube.com/watch?v=fpLAb7YtLK8

اضافة 3 : فيديو اخر يوضح التجمهر حول سيارة عمرو موسى
http://www.youtube.com/watch?v=-4jQbWoOuTs&feature=related

اضافة 4 : صورة توضح الاعتداء على السيدة



شكر خاص ل احمد رسلان : على فيديو موكب السيد عمرو موسى
محمد الشرنوبى : على الفيديو من زاوية اخرى
عبدالله مرجان صاحب الفيديو الول وصاحب البلوج (:

l

الاكثر قراءة

ShareThis